Muayak Jak Peghpasan

Way laay gandai-gandai
Aghus matohko helu
Kain bughak ti ghedai
Tangeh beguna diku

Way jambu lamon liku
Pangkalan di bah ghuntan
Ughik yu mati payu
Sapi niku ngandan badan

Way timbul pajagh bulan
Pangkalan di bah buah
Sekamyu kambas kudan
Di pukuk kapan gayah

Kangighing padang peghing
Ghantu kindang lalat wai
Kik ngangonko di geghing
Sakaku hinom kik injak wai

Begkingin balik angin
Salaini bukang jawoh
Di dunia nyak lain
Diagherat mejaoh

Udi kapal ti liu
Tunggak mik kabuang
Dengi pai sakik ku yu
Kak tanggai pandai miwang

Ghua kilo jak pulau
Labuhan di kuala
Jukung bawakni kuwau
Nyembeghang lawok bena

Mak mati pandan kudo
Kik di timbas sai lembah
Mak mati badan kudo
Mesaka mak ku liak

Nenggeghi tano mangi
Sanak mulang sekula
Dibingi tihanipi
Di ghani sepok mata

Pekon punduh sai masuk
Menyancang sai mepangga
Sekamyu kambang ghedup
Pang palimuk dunia

Dang niku teghai ghani
Payah ulun sai buddah
Miwang ngagegok jaghi
Ngupas luh kighi kanan

Bulan bagha pak belas
Pintagh ni sanak ngaji
Ghepa pak mak tinggal malas
Niku bang mungkagh janji